फागुन १३ मा नौ महिनादेखि १५ बर्षसम्मलाई खोप लगाईने

चितवन । यही फागुन १३ गतेदेखि देशैभरी दादुरा–रुबेला खोप अभियान सञ्चालन हुने भएको छ । नौ महिनादेखि १५ वर्ष उमेर समूहका सबैलाई खोप लगाईने भएको हो । बि.सं. २०७९–८९ मा नेपालका चितवन सहित १९ जिल्लामा दादुरा महामारीको रुपमा देखा परेपछि सरकारले यो अभियान सञ्चालन गरेको हो । महामारीबाट १९ जिल्लामा एक हजार ३४९ जनामा दादुरा देखिएको थियो भने एक जनाको मृत्यु समेत भएको थियो । संक्रमित मध्ये ७४ प्रतिशत नौ महिनादेखि १५ वर्षमुनिका बालकालिका रहेका थियो ।

ती बालबालिकाहरुमा एउटा मात्रा पनि खोप नलगाएका २६ प्रतिशत, खोप लगाएको थाहा नपाएका ३० प्रतिशत दुई वा सोभन्दा बढी मात्रा लगाएका २१ प्रतिशत र एक मात्रा खोप लगाएका २३ प्रतिशत रहेका थिए । यसरी हेर्दा खोप नलगाएकाहरुमा संक्रमण फैलिएपछि अभियानको रुपमा सञ्चालन गर्न लागिएको हो । सरकारले भूकम्प गएपछि जाजरकोट र रुकुम पश्चिममा भने दादुरा रुबेला खोप अभियान सम्पन्न गरिसकेको छ ।

अभियानको क्रममा नौ महिनादेखि ५ वर्षमुनिका बालबालिकालाई दादुरा–रुबेला खोपका अतिरिक्त डिपिटि–हेप बी–हिव, पिसिभी र आईपिभि खोप समेत लगाईने छ भने नौ महिनादेखि १५ वर्षसम्मका सबैलाई दादुरा–रुबेला खोप लगाईने छ । स्वास्थ्य कार्यालय चितवनका प्रमुख दिनेश रुपाखेतीका अनुसार फागुन १३ गतेदेखि चैत १ गतेसम्म अभियान सञ्चालन हुनेछ । अभियानका क्रममा नौ महिनादेखि ५ वर्षसम्मका बालबालिकाको नियमित खोप कार्ड हेरेर अभिभावकलाई सोधेर नियमित खोप लगाउन छुट भए नभएको अवस्था समेत निश्चित गरिने उहाँले जानकारी दिनुभयो ।

यसरी छुटेकाहरुलाई नियमित खोप केन्द्रसम्म पुग्नका लागि सहजीकरण समेत गरिने छ । २५० जनाभन्दा बढी बालबालिका भएका संस्थागत र सामुदायिक विद्यालयमा खोप केन्द्र रहने छन् । विद्यालय नभएका ठाउँहरुमा पनि खोप केन्द्र रहने छन् । यसैगरी शहरका घना बस्ती, सुकुम्बासी वस्ती, उद्योग, कारखाना, बाल मन्दिर, अनाथ आश्रम, ईटा भट्टा, अन्तरदेशिय सीमा, बसपार्क जस्ता ठाउँमा पनि खोप केन्द्र राखेर सेवा दिईने छ ।