काठमाडौं । दिल्लीको तल्लो अदालतले गायक तथा र्यापर हनी सिंह र उनकी श्रीमती शालिनी तलवारको सम्बन्धविच्छेदको निवेदन स्वीकृत गरेको छ ।
हनी सिंहका वकिल इशान मुखर्जीले बीबीसीलाई बताएअनुसार उनीहरुको सम्बन्ध विच्छेदको मुद्दा साढे दुई वर्षदेखि चलिरहेको थियो । साकेत पारिवारिक अदालतका मुख्य न्यायाधीश परमजीत सिंहले मंगलबार यस्तो फैसला सुनाएका हुन् ।
फैसला सुनाउने क्रममा न्यायाधीशले ४० वर्षीय गायकलाई आफ्नी श्रीमतीसँग बस्ने प्रयास गर्ने हो कि भनेर सोधे । यसको जवाफमा उनले अब यसका लागि कुनै सम्भावना नरहेको बताए ।
गायक हिरदेश सिंहलाई उनका फ्यानहरू यो यो हनी सिंहको नामले पनि चिन्छन्।
हनी सिंहकी श्रीमती शालिनीले उनीमाथि घरेलु हिंसाको आरोप लगाएकी थिइन् । तर दुई पक्षबीच सहमति भएपछि शालिनी तलवारले आफ्नो आरोप फिर्ता लिइन् ।
तर, सम्झौताका सर्तहरू सिल बन्द खाममा अदालतमा पेश गरिएको थियो। गत वर्ष सेप्टेम्बरमा हनी सिंहले शालिनी तलवारलाई १ करोड रुपैयाँको डिमान्ड ड्राफ्ट पनि दिएका थिए ।
