चैत्र १ , काठमाडौँ
नेपाल शिक्षक महासंघले अविलम्ब शिक्षा ऐन जारी गर्नुपर्ने माग गर्दै सुरु गरेको दोस्रो चरणको आन्दोलनअन्तर्गत शुक्रबार नेकपा माओवादी केन्द्रको केन्द्रीय कार्यालय, पेरिसडाँडामा धर्ना दिएको छ। मंगलबार सत्तारुढ नेपाली कांग्रेस केन्द्रीय कार्यालय सानेपा र बुधबार नेकपा एमाले कार्यालयमा धर्ना दिएका शिक्षक र विद्यालय कर्मचारीहरूले शुक्रबार माओवादी केन्द्रको केन्द्रीय कार्यालयमा धर्ना दिएका हुन्।
धर्नाको क्रममा पार्टि कार्यालय प्रवेश गर्दैगरेका नेकपा माओवादीका बरिष्ठ उपाध्यक्ष नारायणकाजी श्रेष्ठले शिक्षकले आन्दोलन गरिरहनु नपर्ने र हामीले परिमार्जन सहितको शिक्षा ऐन चाडो भन्दा चाडो ल्याउन पहल गर्ने कुरा बताए। यसैगरी नेकपा माओवादीका महाचाचिव देव गुरुङ्गले शिक्षकहरुको ज्ञापन पत्र बुज्दै शिक्षाका मागहरु जायज भएको बताए।
दोस्रो चरणको आन्दोलनअन्तर्गत उनीहरूले चैत ५ गतेसम्म विभिन्न राजनीतिक दलका पार्टी कार्यालयमा धर्ना दिने कार्यक्रम तय गरेका छन्। शिक्षक महासंघका अध्यक्ष लक्ष्मीकिशोर सुवेदीले प्रतिनिधिसभाको शिक्षा, स्वास्थ्य तथा सूचना प्रविधि समितिमा विचाराधीन विद्यालय शिक्षा विधेयक-२०८० लाई शिक्षा ऐनको रूपमा संसद्काे यही हिउँदे अधिवेशनबाट जारी गर्नुपर्ने आफूहरूको प्रमुख माग भएको बताए।
उनले भने, ‘विगतमा पटकपटक आन्दोलन गरेर सहमति भएका छन्। ती सहमतिहरूलाई सम्बोधन हुनेगरी विद्यालय शिक्षा ऐन यही हिउँदे अधिवेशनबाट जारी गर्नुपर्छ भनेर दबाब निर्माण गर्नका लागि आन्दोलनमा छौं।’
महासंघले पहिलो चरणको आन्दोलनपछि पनि ठोस पहल नभएको भन्दै अब संघर्षलाई अझ सशक्त बनाउने चेतावनी दिएको छ। पार्टी कार्यालयहरूमा धर्नाको कार्यक्रमपछि सांसदहरूसँग भेटघाट तथा पक्षीकरण, काठमाडौँमा रिले अनशन र काठमाडौँमा अनिश्चितकालीन सडक आन्दोलन गर्ने महासंघको तयारी छ।
