अमेरिकाले भारतमाथि थप २५ प्रतिशत भन्सार गर्ने आधिकारिक सूचना जारी गर्दै आजदेखि नयाँ दर लागू गरेको छ। भारतीय समयानुसार बिहान ९ः३० बजेदेखि लागू भएको व्यवस्थाअनुसार अब भारतीय सामानमाथि कुल ५० प्रतिशत भन्सार हुनेछ। यसअघि भारतमाथि २५ प्रतिशत मात्र भन्सार गरिएको थियो।
सूचनामा भनिएको छ, २०२५ अगस्ट २७ वा त्यसपछि आयात हुने वा गोदामबाट निकालिने कुनै पनि भारतीय उत्पादन नयाँ कर दरको दायरामा पर्नेछ। अमेरिकी राष्ट्रपति डोनाल्ड ट्रम्पले भारतले रुसबाट कच्चा तेल खरिद गरी अप्रत्यक्ष रूपमा युक्रेन युद्धमा सहयोग गरेको आरोप लगाउँदै भन्सार बढाइएको बताएका छन्। तर भारतले उक्त निर्णयलाई “अनुचित, तर्कहीन र अकारण” भन्दै अस्वीकार गरेको छ।
यसअघि, अप्रिल २०२५ मा ट्रम्पले भारतमाथि २५ प्रतिशत कर गर्ने घोषणा गरेका थिए। तर उक्त निर्णय ९० दिनका लागि स्थगित गरिएको थियो। त्यसपछि जुलाई २०२५ मा उनले अगस्ट १ बाट २५ प्रतिशत कर लागू गर्ने घोषणा गरे। अन्ततः अगस्ट २५ मा ट्रम्पले थप २५ प्रतिशत कर गर्ने निर्णय गर्दै कुल भन्सार दर ५० प्रतिशत पुर्याएका हुन्।
