चितवन – नेपाली कांग्रेसको तर्फबाट चितवन क्षेत्र नम्बर–२ बाट उम्मेदवारी दिएकी मिना खरेलले आफ्नो उम्मेदवारी नै सम्पुर्ण महिलाहरुको उम्मेदवारी भएको बताएकी छन् । उनले महिलाहरूको उत्साहजनक समर्थन, साथले आफ्नो जित भएको अनुभव गराएको बताईन् ।
मिना खरेल विगत करिब ३६ वर्षदेखि चितवनका ग्रामीण तथा शहरी क्षेत्रमा महिला तथा बालबालिकाको पक्षमा सामाजिक अभियन्ताका रूपमा सक्रिय रहदै आएकि छन् । महिलामाथि हुने अन्याय, हिंसा, अत्याचार तथा विभेदका घटनामा साथ दिँदै अनाथ तथा टुहुरा बालबालिकाका लागि निरन्तर काम गर्दै आएकी खरेलको यही सामाजिक योगदानको पृष्ठभूमिबाट उनी अहिले राजनीतिमा अग्रसर भएकि छन् । खरेलले बाल्यकालदेखि नै राजनीतिलाई बुझ्दै सामाजिक कार्यलाई आफ्नो जीवनको निरन्तर यात्राका रूपमा अगाडि बढाएको भन्दै पार्टीले आफ्नो कामको मूल्याङ्कन गरेर निर्वाचनका लागि टिकट दिएकोमा आभार व्यक्त गरिन् ।
उनले यो उम्मेदवारी व्यक्तिगत नभई समग्र चितवन क्षेत्र नम्बर–२ का महिलाहरूको प्रतिनिधित्व गर्ने उम्मेदवारी भएको उल्लेख गरेकि छ्न् । खरेलले क्षेत्र नम्बर–२ का महिलाहरू, पार्टीमा आबद्ध महिला कार्यकर्ताहरू तथा स्वतन्त्र रूपमा क्रियाशील महिलाहरूको समर्थनले आफूलाई जीतको अनुभूति गराएको बताइन् । विजयी भएर सरकारमा पुगेपछि महिला तथा बालबालिकासँग सम्बन्धित मुद्दाहरू संसदमा सशक्त रूपमा उठाउने प्रतिबद्धता पनि उनले व्यक्त गरिन्। विजयपछि चितवन–२ को पहिचानलाई राष्ट्रिय स्तरमा मजबुत बनाउँदै महिला तथा बालबालिकाका अधिकार सुनिश्चित गर्ने कानुन निर्माणमा सक्रिय भूमिका खेल्ने विश्वाससमेत खरेलले व्यक्त गरिन् ।
महिलाहरूको ठूलो उपस्थिति र उत्साह देखेर आफू गौरवित भएको बताउँदै उनले रुख चिह्नमा मतदान गरी विजयी गराउन मतदातासँग अपिल समेत गरेकी छ्न् । ।
