भरतपुर- मैयाँदेवी कन्या कलेजका छात्राहरूलाई स्वागत तथा सम्मान गरिएको छ । शुक्रवार कलेजमा कार्यक्रम आयोजना गरी कक्षा १२ पास गरेका छात्राहरूलाई बधाई तथा स्नातक तहमा अध्ययन गर्ने छात्राहरूलाई स्वागत गरिएको हो । कलेजले स्नातक तहमा अध्ययन गर्ने छात्राहरूलाई आकर्षक सुविधा समेत दिने कलेजका प्रिन्सिपल भोजराज न्यौपानेले बताए ।
कलेज सञ्चालक समितिले सस्थापक संरक्षक स्व०मैयाँदेवी श्रेष्ठको परिकल्पना अनुसार हरेक बिधामा छात्राबृत्तिको ब्यवस्था मिलाएको हो । जसमा नेपाल प्रथम हुनेलाई ५१ हजार रूपैयाँ र चितवन प्रथम हुनेलाई २१ हजार रूपैयाँ लगायत अन्य सम्मानको ब्यवस्था गरेको कार्यक्रमका प्रमुख अतिथि , कलेज सञ्चालक समितिका अध्यक्ष टंकनाथ पौडेलले बताए, शिक्षा क्षेत्रमा मैयाँदेवी श्रेष्ठको योगदान अतुलनीय रहेको स्मरण गर्दै उहाँकै स्मरणमा शैक्षिक क्षेत्रमा योगदान गरिने पौडेलले बताए । कार्यक्रममा प्रध्यापक संघका सभापति कृष्णप्रसाद न्यौपानेले शुभकामना मन्तव्य प्रस्तुत गरेका थिए भने कार्यक्रमको सञ्चालन सहायक प्रिन्सिपल तेजप्रसाद पौडेलले गरेका थिए ।
