कपिलवस्तु दिदीभाईलाई विषालु सर्पले डसेको छ। हिजो (मंगलवार) राति कपिलवस्तु नगरपालिका वडा नम्बर १ जमुहरा टोलमा बस्ने राकेश गुप्ताका ११ वर्षिय छोरा अनमोल गुप्ता र १५ वर्षिया छोरी अस्मितालाई सर्पले डसेको हो।राति खाटमासँगै सुतेका २ दिदी बहिनी (प्रिया र अस्मिता), भाई (अनमोल) मध्य अस्मिता र अनमोललाई सर्पले डसेको थियो । सर्पले डस्दा भाईको अवस्था चिन्ताजनक रहेको र उनको प्रादेशिक अस्पताल बुठलमा उपचार भईरहेको दिदी प्रियाले जानकारी दिएकी छिन् । यस्तै अस्मिताको अवस्था भने खतरामुक्त रहेको प्रियाले बताइन।
सर्पले डसेको बारे थाहा नभएको तर, राति २ बजे भाई बहिनीले वान्ता गर्न थालेको र रिगंटा समेत लागे पछि कपिलवस्तु अस्पताल लगिएको थियो। त्यहाँबाट गोरुसिंगेस्थित सर्पदंश उपचार केन्द्रमा उपचारका लागि लगिएको थियो। त्यहाँ पनि उपचार सम्भव नभएपछि थप उपचारका लागि प्रादेशिक अस्पताल बुटवल लगिएको हो।
