चितवनको खोरसोरस्थित हात्ती प्रजनन् तथा तालिम केन्द्रमा जन्मिएको नयाँ हात्तीको भाले छावाको आज ‘न्वारन’ गरिएको छ ।
छावाको न्वारनसंगै ‘वेदगज’ नामाकरण गरिएको छ । केही समय पहिले निधन भएका संरक्षणकर्मी वेदकुमार खड्काको सम्झना र सम्मान स्वरुप हात्तीको छावाको नामाकरण ‘वेदगज’ राखिएको चितवन राष्ट्रिय निकुञ्जका प्रमुख संरक्षण अधिकृत गणेश पन्तले जानकारी दिनुभयो ।
छावाको पूजापाठ गरेर न्वारन गरिएसंगै माला लगाएर छावाको नामाकरण ‘वेदगज’ रहने प्रमुख संरक्षण अधिकृत पन्तले घोषणा गर्नुभयो । न्वारन कार्यक्रममा बोल्दै प्रमुख संरक्षण अधिकृत पन्तले भन्नुभयो–‘यहाँ जन्मिएका छावाहरुको न्वारन गरेर नामाकरण गर्ने प्रचलन रहँदै आएको छ, आज न्वारन गरिएको छावाको नाम ‘वेदगज’ रहने घोषणा गर्दछु ।’ स्वर्गीय खड्का चितवन राष्ट्रिय निकुञ्जमा लामो समय संरक्षण अधिकृत भएर काम गरी अवकाश पाएका व्यक्ति हुन् । उनी दुर्लभ जीव घडियाल गोही संरक्षणका लागि समर्पित थिए। खड्काको गत जेठमा निधन भएको थियो ।
गत असार २८ गते लोकतन्त्रकलीले ‘वेदगज’लाई तेस्रो सन्तानको रुपमा जन्म दिएको हात्ती प्रजनन् तथा तालिम केन्द्रका प्रमुख मनपुरन चौधरीले जानकारी दिनुभयो । ‘लोकतन्त्रकली’को पहिलो सन्तान ‘बुधगज’ र दोस्रो ‘स्वर्णकली’ हुन् ।
वि.सं. २०६३ सालको वैशाख ११ गते जन्मिएकै कारण सो हात्तीले ‘लोकतन्त्रकली’ नाम पाएको हो । ०६२/६३ को जनआन्दोलन सफल भई त्यसै दिन नेपालमा लोकतन्त्र पुनः स्थापना भएको थियो । त्यसअघि हात्तीको छावाको नाम पनि दरबारबाटै राख्ने चलन थियो । ‘लोकतन्त्रकली’को नाम पहिलो पटक चितवन निकुञ्ज प्रशासनबाटै राखिएको थियो ।
चौधरीका अनुसार खोरसोरमा पछिल्लो तीन महिनामै हात्तीका ३ वटा नयाँ छावाको जन्म भइसकेको छ । भाले हात्तीको नामको पछाडि ‘गज’ र पोथीको नामको पछाडि ‘कली’ राख्ने चलन छ ।
