चितवन प्रहरीले बिदाको दिन अनुमतिविना चलाइएका ४० सरकारी सवारी साधन नियन्त्रणमा लिएको छ । शनिवार र आइतबार सार्वजनिक बिदा रहेकाले विना इजाजत चलाएको भन्दै प्रहरीले ती सवारी साधनलाई नियन्त्रणमा लिएको हो । पृथ्वी राजमार्गको मुग्लिनदेखि मौवाखोला र नारायणगढ–मुग्लिन सडकखण्डको मुग्लिनदेखि जुगेडीसम्मको क्षेत्रमा चेकजाँच गरी सरकारी सवारीसाधन नियन्त्रणमा लिइएको इलाका प्रहरी कार्यालय मुग्लिनका प्रहरी निरीक्षक प्रतिक सिंहले जानकारी दिनुभयो । सरकारी गाडीको दुरुपयोग बढेको गुनासोपछि बिदाका दिन सम्बन्धित प्रशासन कार्यालयको विना अनुमति चलाउने सरकारी गाडी नियन्त्रणमा लिएको उहाँले बताउनुभयो ।
गोरखा र तनहुँ जिल्लाका कार्यालयका सबैभन्दा धेरै सवारीसाधन नियन्त्रणमा लिइएको छ । नियन्त्रणमा लिएका सवारीसाधनले सम्बन्धित प्रशासन कार्यालयको पास ल्याएपछि मात्र छाडिएको प्रहरीले जनाएको छ । सरकारी सवारीसाधनको दुरुपयोग रोक्न चलाइएको अभियानलाई निरन्तरता दिने निरीक्षक सिंहले बताउनुभयो । यसका अतिरिक्त ट्राफिक नियम उल्लङ्घन गर्नेहरूलाई प्रहरीले नियमित कारबाही गरेको सिंहले बताउनुभयो । राजमार्ग क्षेत्रमा हुने दुर्घटना न्युनिकरणका लागि प्रहरीले सचेतना अभियान समेत सञ्चालन गरिहेको छ ।
