गोरखामा निजी स्तरबाट निर्माण भएको अत्याधुनिक सुविधासम्पन्न एनपीआइ गोरखा अस्पतालको सेवा शुभारम्भ भएको छ । आइतबार गण्डकी प्रदेशका मुख्यमन्त्री सुरेन्द्र पाण्डेले अस्पतालको उद्घाटन तथा सेवा शुभारम्भ गर्नुभयो ।
सो अवसरमा बोल्दै मुख्यमन्त्री पाण्डेले गोरखामै सय शैयाको सुविधासम्पन्न अस्पताल निर्माण भएपछि चितवन, पोखरा र काठमाडौं जानुपर्ने बाध्यता अन्त्य भएको बताउनुभयो । उहाँले भन्नुभयो,‘स्वास्थ्य उपचारका लागि यहाँका नागरिकले खर्चिदै आएको पैसा र समयको बचत हुनेछ, स्वास्थ्य सेवासंगै रोजगारी र यहाँको व्यापार व्यवसायमा समेत फाइदा पुग्नेछ ।’ उहाँले ठूलो लगानीमा पहाडी जिल्लामा अस्पताल सञ्चालन गरेको भन्दै चितवन र गोरखाका व्यवसायीलाई धन्यबाद दिनुभयो । नीजि क्षेत्रलाई लगानीको वातावरण बनाउन प्रदेश सरकार तयार रहेको भन्दै मुख्यमन्त्री पाण्डेले स्वास्थ्य सेवा सबै जनताको पहुँचमा पुग्नुपर्ने बताउनुभयो । गण्डकी प्रदेश स्वास्थ्यको हव बन्ने चरणमा रहेको भन्दै उहाँले युवा जनशक्तीलाई देशमै काम गर्ने वातावरण बनाउनुपर्ने उल्लेख गर्नुभयो ।
गण्डकी प्रदेशका उर्जा जलश्रोत तथा खानेपानी मन्त्री फडिन्द्र देवकोटाले चिसो हावापानीमा आफ्नै घरदैलोमा बिशेषज्ञ स्वास्थ्य सेवा पाउनु गौरबको बिषय भएको बताउनुभयो । उहाँले देशको चौतर्फी बिकासका लागि प्रदेश सरकार सबै निकायसंग सहकार्यका लागि तयार रहेको बताउनुभयो ।
गोरखा नगरपालिकाका प्रमुख कृष्णबहादुर रानामगरले अस्पतालले स्वस्थ्य क्षेत्रमा दुर्गम भेगका नागरिकले भोगेको कष्टलाई निराकरण गर्ने बताउनुभयो । गोरखामा स्वास्थ्य क्षेत्रमा विकासको प्रारम्भ भएको भन्दै सेवाको अधिकतम उपभोग गर्न नागरिकलाई आग्रह गर्नुभयो ।
चितवन र गोरखाका ब्यवसायीहरु मिलेर ५५ करोडको लागतमा एनपिआई गोरखा अस्पताल निर्माण गरेका हुन । गोरखा नगरपालिका–८ को नमूना प्रतिक्षालय टोलमा निर्माण भएको अस्पतालबाट सबै प्रकारका विशेषज्ञ सेवा प्रदान गर्ने एनपीआइ गोरखा अस्पताल प्रालिका अध्यक्ष लेखराज पन्त (हरी)ले बताउनुभयो । उहाँका अनुसार अस्पताल सञ्चालनका लागि गण्डकी प्रदेशको स्वास्थ्य मन्त्रालयबाट सय बेडको स्वीकृती प्राप्त भएको छ । गोरखामै अत्याधुनिक मेशिनहरु जडित अस्पताल निर्माण भएकाले बिशेषज्ञ सहितको स्वास्थ्य सेवा लिन काठमाडौं र भरतपुर जानुपर्ने बाध्यता हटेको पन्तले बताउनुभयो ।
२०७७ साल माघ ५ गतेबाट निर्माण सुरु गरेको अस्पताल गतवर्ष नै निर्माण सम्पन्न भएपनि भवन पास (निर्माण सम्पन्नताको प्रमाणपत्र) प्राप्त हुन समय लागेका कारण सञ्चालनमा ढिलाइ भएको थियो । ९ रोपनी क्षेत्रफलमा फैलिएको अस्पतालमा बहिरंग र अन्तरंगका साथै छुट्टाछुट्टै क्याविन समेत निर्माण गरिएको छ । जिल्लामा नै पहिलो पटक अस्पतालले सिटी स्क्यान मेशिन जडान गरेको जनाएको छ ।
अस्पतालले सुरुमा विशेषज्ञ चिकित्सकहरु सहित फिजिसियन, हाडजोर्नी, बालरोग, स्त्री, सर्जन, रेडियोलोजिष्ट र एनेथेसियोलोजिष्ट सेवा दिने अस्पतालका प्रबन्ध निर्देशक पुष्पराज धितालले नारायणी अनलाइनलाई जानकारी दिनुभयो । उहाँका अनुसार अस्पताल आउने बिरामीले नाक, कान, घाँटी छालारोग र नशा तथा मानसिक रोगका चिकित्सक सेवा समेत पाउनेछन । अस्पतालले आफ्नै फार्मेशी समेत सञ्चालन गरेको छ ।
अस्पतालले सेवा शुभारम्बको अवसर पारेर आइतबार ओपिडी निःशुल्क व्यवस्था गरेको छ भने सबै प्रकारका उपचारमा ५० प्रतिशत छुट दिइने निर्देशक धितालले जानकारी दिनुभयो । उहाँका अनुसार भदौ २ र ३ गते उपचारमा आउने विरामीलाई २५ प्रतिशत छुटको व्यवस्था गरिएको छ । यस अस्पतालबाट गोरखासंगै लमजुङ, तनहुँ र धादिङका बिरामीलाई सेवा प्राप्त गर्न सहज हुनेछ ।
