काठमाडौँ । प्रविधि क्षेत्रको अग्रणी कम्पनी ओपनएआईले च्याटजीपीटीको कार्यक्षमता बढाउनका लागि एउटा ठुलो अपग्रेडको घोषणा गरेको छ। यस नयाँ अपडेटपछि च्याटबोटले प्रयोगकर्ताहरूसँग भएका अघिल्ला कुराकानीहरूबाट प्राप्त जानकारीको अझ प्रभावकारी रूपमा प्रयोग गर्न सक्नेछ।
समयसँगै प्रयोगकर्ताका रुचि, प्राथमिकता, चलिरहेका परियोजना र व्यक्तिगत विवरणहरूलाई सम्झने प्रक्रियामा सुधार ल्याउने उद्देश्यले यो प्रविधि ल्याइएको हो।पुराना र महत्त्वपूर्ण कुराहरू च्याटबोटले बिर्सिने समस्यालाई समाधान गर्न र निरन्तर बढिरहेको प्रयोगकर्ताको सङ्ख्यालाई ध्यानमा राखेर यो फिचरलाई थप प्रभावकारी बनाइएको ओपनएआईले जनाएको छ। कम्पनीका अनुसार यो नयाँ प्रणाली एउटा परिमार्जित आर्किटेक्चरमा आधारित छ, जसले ठुलो परिमाणको मेमोरीलाई निकै कुशलताका साथ व्यवस्थापन गर्न सक्छ।
ओपनएआईले आफ्नो ब्लग पोस्टमार्फत ‘ड्रिमिङ’ नामको नयाँ मेमोरी आर्किटेक्चरको विस्तृत विवरण सार्वजनिक गरेको छ। यो प्रविधिले ब्याकग्राउन्डमा काम गरेर अघिल्ला संवादहरूबाट सङ्कलन गरिएका जानकारीहरूलाई व्यवस्थित र रिफ्रेस गर्ने गर्दछ।
यसले गर्दा च्याटजीपीटीलाई पुराना र आवश्यक सन्दर्भहरू याद राख्न सजिलो हुन्छ र प्रयोगकर्ताले एउटै विवरण बारम्बार दोहोर्याइरहनु पर्दैन। यो फिचर हालका लागि अमेरिकामा रहेका च्याटजीपीटी ‘प्लस’ र ‘प्रो’ सब्सक्राइबरहरूका लागि रोलआउट भइरहेको छ। आगामी केही हप्ताभित्रै अन्य क्षेत्रका साथै ‘फ्रि’ र ‘गो’ प्रयोगकर्ताहरूका लागि पनि यसको सपोर्ट उपलब्ध गराइने कम्पनीले स्पष्ट पारेको छ।
यो पछिल्लो रिलिज विगत दुई वर्षमा प्रस्तुत गरिएका सुरुवाती मेमोरी फिचरहरूको अनुभवमा आधारित छ। ओपनएआईले सन् २०२४ मा ‘सेभ्ड मेमोरिज’ लन्च गरेको थियो, जसका माध्यमबाट प्रयोगकर्ताले च्याटजीपीटीलाई कुनै विशेष जानकारी याद राख्नका लागि आग्रह गर्न सक्थे। त्यसको एक वर्षपछि कम्पनीले यस फिचरको दायरा बढाउँदै ‘ड्रिमिङ’ को सुरुवाती संस्करणमार्फत च्याटबोटलाई पुरानो कुराकानीको सन्दर्भ लिन सक्ने बनाएको थियो।
ओपनएआईका अनुसार यो अपडेटेड सिस्टमले मुख्य गरी तीनवटा क्षेत्रमा ध्यान केन्द्रित गर्छ। पहिलो, अघिल्ला कुराकानीहरूबाट काम लाग्ने सन्दर्भहरू कायम राख्ने, दोस्रो, प्रयोगकर्ताको इच्छा वा प्राथमिकतालाई निरन्तर लागू गर्ने र तेस्रो, भण्डारण गरिएका जानकारीहरू बदलिँदो परिस्थिति अनुसार अपडेटेड छन् भन्ने सुनिश्चित गर्ने।
यस घोषणासँगै कम्पनीले आफ्ना आन्तरिक बेन्चमार्क नतिजाहरू पनि सार्वजनिक गरेको छ, जसले यी तीनवटै विधामा ठूलो सुधार भएको देखाउँछ। विवरणहरू सम्झने क्षमताको स्कोर ६७.९ प्रतिशतबाट बढेर ८२.८ प्रतिशत पुगेको छ भने प्रयोगकर्ताको प्राथमिकता पालना गर्ने दर ५५.३ प्रतिशतबाट बढेर ७१.३ प्रतिशत पुगेको छ। समय अनुसार आवश्यक मेमोरी कार्यहरू गर्ने क्षमतामा पनि सुधार आएर ५२.२ प्रतिशतबाट ७५.१ प्रतिशत पुगेको छ।
यसका अतिरिक्त, प्रयोगकर्ताहरूले अब एउटा नयाँ ‘मेमोरी समरी पेज’ को एक्सेस पनि पाउनेछन्। यस पेजमा च्याटजीपीटीले समयसँगै प्रयोगकर्ताका बारेमा के-के कुरा सिकेको छ भन्ने विवरण देखिनेछ।
यस सुविधामार्फत प्रयोगकर्ताले भण्डारण गरिएका जानकारीहरूको समीक्षा गर्न, त्यसमा आवश्यक सुधार गर्न, विवरणहरू हटाउन वा भविष्यका कुराकानीका लागि कुन-कुन विषय याद राख्ने भनी चिन्ह लगाउन सक्नेछन्।
