विजय बराल अभिनीत फिल्म ‘पूर्णबहादुरको सारंगी’ ले एक महिनाको यात्रा पार गरिसकेको छ। यस फिल्मले नेपालमा ५० करोडको व्यापार गर्दा विदेशमा २५ करोड कमाइ गरेको छ।
यस फिल्मले प्रदर्शनको पाँचौं सातासम्म पनि हलहरुबाट राम्रो शो पाएको छ। आज पनि देशकै ठूलो मल्टिप्लेक्स चेन क्यूएफएक्सले उपत्यकाभरि २७ शो उपलब्ध गराएको छ।
त्यसैगरी बिग मुभिजले ५, वान सिनेमाजले ७ र एफक्युब सिनेमाजले ५ शो दिएको छ। त्यसैगरि, ‘ह्रस्व दीर्घ’ र ‘तेल भिसा’ लाई पनि हलहरुले राम्रै शो उपलब्ध गराएका छन्।
तर, बिहीबारदेखि भने नेपाली फिल्मको शोमा भारी गिरावट आएको छ। भोलि दक्षिण भारतीय फिल्म ‘पुष्पा २’ लाई ५९१ शो दिँदा नेपाली फिल्महरुको भने शो ह्वातै घटेको हो।
क्यूएफएक्स उपत्यकाभरिका हलमा ‘पूर्णबहादुरको सारंगी’ को शो खुम्चिएर १० मा झरेको छ। त्यसैगरि, वान सिनेमाजदेखि बिग मुभिज र एफ क्युब सिनेमाजले एक शो मात्रै उपलब्ध गराएका छन्। अझ ‘ह्रस्व दीर्घ’ र ‘तेल भिसा’ एउटा शो उत्रारिएको छ। जसकारण मंसीर २० गतेबाट ‘पूर्णबहादुरको सारंगी’ सहितका नेपाली फिल्मको व्यापारमा निकै असर पर्ने देखिन्छ।
