भारतको तमिलनाडु राज्यस्थित कडलूर जिल्लामा बुधबार राति भएको एउटा सडक दुर्घटनामा परी ९ जनाको ज्यान गएको छ। तिरुचिरापल्लीबाट चेन्नईतर्फ जाँदै गरेको सरकारी रोडवेज बसको टायर अचानक पड्किएर अनियन्त्रित हुँदा यो घटना भएको हो।
अनियन्त्रित बस सडकको डिभाइडर नाघेर अर्को लेनमा पुगेपछि विपरित दिशाबाट आइरहेका दुईवटा कारलाई कुल्चिन पुगेको थियो। बसले किचेका दुवै कारहरू पूर्ण रूपमा चकनाचूर भएका छन्।
दुर्घटना लगत्तै स्थानीय बासिन्दा र प्रहरीले उद्धार कार्य सुरु गरेका थिए। घटनास्थलमै ७ जनाको मृत्यु भएको थियो भने उपचारका क्रममा थप २ जनाले ज्यान गुमाएका छन्। ज्यान गुमाउनेहरूमा ५ पुरुष र ४ महिला रहेका छन्। दुर्घटनामा परी ४ जना गम्भीर घाइते भएका छन्, जसमा २ बालबालिका समेत रहेका छन्। घाइतेहरूको हाल सरकारी अस्पतालमा उपचार भइरहेको छ।
यो दुर्घटनाका कारण चेन्नई–तिरुची राष्ट्रिय राजमार्गमा धेरै किलोमिटर लामो सवारी जाम लागेको थियो। करिब दुई घण्टापछि क्रेनको सहायताले दुर्घटनाग्रस्त सवारी साधनहरू हटाएर सडक सञ्चालनमा ल्याइएको थियो। प्रहरीले घटनाको थप अनुसन्धान गरिरहेको छ।
तमिलनाडुका मुख्यमन्त्री एमके स्टालिनले घटनाप्रति गहिरो दुःख व्यक्त गर्दै मृतकका परिवारप्रति समवेदना प्रकट गरेका छन्। मुख्यमन्त्री राहत कोषबाट मृतकका परिवारलाई जनही ३ लाख भारतीय रुपैयाँ र घाइतेहरूलाई १ लाख रुपैयाँ आर्थिक सहायता दिने घोषणा समेत गरिएको छ। एजेन्सी
