केन्याको एक अदालतले बेल्जियमका दुई किशोरसहित चार जनालाई हजारौँ जीवित कमिला देशबाहिर तस्करी गर्ने प्रयास गरेको अभियोगमा सात हजार डलरभन्दा बढी जरिवाना गरेको छ।
केन्या वन्यजन्तु सेवा (केडब्लुएस) ले चारै जनालाई ‘जैविक चोरी’ मा संलग्न भएको आरोप लगाएपछि यो मुद्दा चर्चित भएको छ।
बेल्जियमका १८ वर्षीय डेभिड लोर्नोय र सेप्पे लोडेविजक्स, भियतनामका दुह हुङ गुयेन र केन्याका डेनिस न्गाङ्गाले कमिला राखेको स्वीकार गरेका छन्, तर तस्करीको उद्देश्य नरहेको दाबी गरेका छन्।
नैरोबीबाट १६० किलोमिटर टाढा नाकुरु काउन्टीमा पाँच हजार रानी कमिलासहित २ हजार २४४ ट्युबमा प्याक गरिएको अवस्थामा लोर्नोय र लोडेविजक्स पक्राउ परेका थिए।
एएफपीले प्राप्त आरोपपत्रअनुसार, दुह र न्गाङ्गासँग कपासको ऊनले भरिएका १४० सिरिन्ज र दुई कन्टेनरमा कमिला फेला परेका थिए। यी दुई घटना छुट्टाछुट्टै भए पनि चारै जनाविरुद्ध सँगै मुद्दा चलाइएको थियो।
बेल्जियममा लोर्नोयलाई ‘कमिला प्रेमी’ को रूपमा चिनिन्छ र उनले घरमा कमिलाका समूह राखेका छन्। उनी ‘कमिला र कमिला पालन’ नामक फेसबुक समूहका सदस्य हुन्।
उनले अनुसन्धानकर्तालाई कमिलाको ओसारपसार गैरकानुनी भएको जानकारी नभएको बताए। नैरोबी प्रहरीले बेल्जियनहरूले बोकेका कमिलाको मूल्य १० लाख शिलिङ (सात हजार ७४० डलर) बराबर रहेको जनाएको छ।
अदालतको प्रतिवेदनअनुसार, चोरीमा दुर्लभ ‘मेसोर सेफालोट्स’ प्रजातिका कमिला पनि थिए, जसको एक रानी कमिलाको बजारमूल्य कम्तीमा ९९ डलर छ।
केन्याको कानुनले अनुमतिबिना वन्यजन्तुको नमूना राख्नुलाई अपराध मान्छ, जसमा १० हजार डलरसम्म जरिवाना वा पाँच वर्ष जेल सजाय हुन सक्छ। अदालतले चारै जनालाई १० लाख शिलिङ (सात हजार ७४० डलर) जरिवाना वा भुक्तान गर्न नसके एक वर्ष जेल सजाय तोकेको छ।
अदालतले लोर्नोय र सेप्पेलाई ‘सामान्य शिकारी’ नभए पनि कानुनबारे अनभिज्ञ रहेको जनाएको छ। केडब्लुएसले उनीहरूको कार्यलाई ‘वन्यजन्तु अपराध र जैविक चोरी’ भएको विज्ञप्तिमा उल्लेख गरेको छ।
‘उनीहरूले कमिलालाई युरोप र एसियाको उच्च मूल्यको विदेशी पाल्तु जनावर बजारमा तस्करी गर्ने उद्देश्य राखेका थिए,’ विज्ञप्तिमा भनिएको छ।
